હૈયાને બે ઘડી જરા હળવું કરી લઉ,
બે ઘડી તારી જોડે જરા વાત કરી લઉ.
મન થાય છે કે તારા હ્ર્દય ઉપર માથુ મુકીને,
મનમાં ભરાયેલો આંસુઓનો ઉભરો કાઢી લઉ.

તુ હોય કે ના હોય મારી સાથે કોઇ વખત,
મારી જાતને સંભાળવાની કોશીશ કરી લઉ.
અંતરથી અળગા થયેલા તારા વિચારોને
મમળાવી લઈને થોડી વાર વાગોળી લઉ.

જિંદગીએ આપેલા ઝખ્મોને યાદ કરીને
લાવ જરા જિંદગીને હસીન બનાવી લઉ.
ઝખ્મો દીધા, ઝખ્મો પર મરહમ પણ દીધા.
એ મરહમને નતમસ્તક સલામ કરી લઉ.

આગળ વધવાનો રસ્તો દેખાય કે ના દેખાય,
ક્યાંક બેસીને હું મંજિલ ની તલાશ કરી લઉ.
કાંટાળા રહ્યા ભલે મંજિલ તરફના બધા રસ્તા
હાથેથી કાંટાઓને અળગા કરી, ત્યાં ગુલાબ ખીલવી લઉ.

લાવ, તારી જોડે બે ઘડી જરા વાત કરી લઉ.